URBANIZATSIYANING AHOLI SALOMATLIGIGA TA’SIRINI BAHOLASH (TOSHKENT SHAHRI MISOLIDA)

Abstract

Annotatsiya. Mazkur tezisda urbanizatsiya jarayonining aholi salomatligiga ta’siri Toshkent shahri misolida o‘rganilgan. Shaharda aholi sonining o‘sishi, transport oqimining ortishi, atmosfera havosining ifloslanishi, shahar shovqini, aholi zichligi va shahar mikroiqlimidagi o‘zgarishlarning inson salomatligiga ta’siri tahlil qilingan. Tadqiqotda O‘zbekiston Respublikasi Milliy statistika qo‘mitasi, Sog‘liqni saqlash vazirligi, Jahon sog‘liqni saqlash tashkiloti va Jahon bankining statistik ma’lumotlari hamda tahliliy materiallaridan foydalanilgan. Natijalar Toshkent shahrida urbanizatsiya jarayonining iqtisodiy va ijtimoiy imkoniyatlar bilan bir qatorda, aholi salomatligiga ta’sir etuvchi ekologik va infratuzilmaviy yuklamani ham kuchaytirayotganini ko‘rsatadi. Bugungi kunda urbanizatsiya dunyodagi eng muhim demografik va hududiy jarayonlardan biridir. Shahar aholisi sonining ortishi bilan birga uy-joy, transport, energetika, sanoat, qurilish va kommunal infratuzilmaga bo‘lgan ehtiyoj ham ortib bormoqda. Urbanizatsiya iqtisodiy va ijtimoiy rivojlanish uchun yangi imkoniyatlar yaratishi bilan birga, shahar muhitining ekologik holatiga va natijada aholi salomatligiga ta’sir qiluvchi qator muammolarni yuzaga keltiradi.